Са славенскай. Пераклад Ніла Гілевіча.

Каму мець Індыю? Каму Багдад?
Хто вешае на плошчах Тэгерана?
Хто сочыць за разнёю на Балканах?
Каму ключы даверыць Цараград?

Глядзіць на карту свету дыпламат:
за грузам груз плыве праз акіяны,
забіты прыстані нарабаваным, —
дык для каго ж зямля і мора — клад?

І я сцялю перад сабой паперы:
гляджу — вачэй не зводжу з родных месц.
Калі паўсюль ірвуць, грабуць без меры,

куды на карце тыцне хіжы перст, —
што будзе з вамі, гнёзды нашай веры —
Цаловец, Марыбор, Гарыца і Трыест?